Oleh : Ahmad Barjie B
Pemerhati Sosial Keagamaan
Tulisan ini sebelumnya dimuat di bagian akhir buku “Secercah Kiprah Seorang Penumpang Kafilah Dakwah; 70 Tahun Tuan Guru Haji Husin Naparin”, yang disusun oleh Nur Hidayatullah, 2017. Ketika mualim berusia 75 tahun, edisi baru buku tersebut diterbitkan kembali oleh Pustaka Agung Kesultanan Banjar 2021, dan saya sebagai editornya. Pada bagian akhir saya ikut membuat tulisan pendek tentang beliau, dalam bahasa Banjar campuran, sebagai berikut:
Ulun sudah rancak mandangar ngaran KH Husin Naparin Lc MA, kira-kira mulai 1982. Wayahitu ulun hanyar badiam di Banjar, imbah sakulah di Kalua, ulun kuliah di Fakultas Dakwah IAIN Antasari. Bubuhan dosen rancak bakisah bahawa ada ulama anum asal Hamuntai (Balangan) nang rahat kuliah di Masir kemudian Pakistan. Kina amun sidin bulik ka banua pacang jadi urang alim. Cuma kada tantu bulik jar, sualnya sidin sambil bagawi di Kadutaan Basar Indonesia di Jeddah Arab Saudi.
Ulun makin tahu ngaran sidin itu pas mambaca buku “Bunga Rampai dari Timur Tengah”, jilid I dan II nang sidin tulis, nang marupakan kumpulan tulisan di Majalah Kiblat Jakarta. Ulun kagum wan himung banar, ada urang banua manulis di media nasional, sualnya manulis di majalah ibukota tu ngalih jua. Ulun saurang suah manulis di Kiblat dua kali haja. Mun kada salah tahun 1984 wan 1985. Imbah tu kadang sing cungul lagi, lawan jua majalahnya sudah tutup.
Imbah sidin bulik ka banua wan rajin badakwah, mulailah rancak ulun malihat sidin, baik langsung nang kaya caramah atawa khutbah, di radio atawa televisi, maupun lewat tulisan sidin di majalah atawa surat kabar. Ulun katuju banar mandangar sidin bacaramah atawa bakhutbah, karna manyantuh parasaan, kalimatnya baintunasi, caramahnya baisi, kadang kita gambira kadang marista, ada lulucuannya jua tapi kada carubu. Bagi sabagian urang lulucuan rahat caramah agama tu parlu jua, tatamba ngantuk jar.
Ulun katuju mambaca tulisan sidin, di surat kabar atawa buku, karna banyak baisi kisah wan nasihat. Ulun banyak jua dibari sidin buku, kada ingat lagi jumlah wan judulnya. Rancak jua ulun kutip isi tulisan sidin. Takadang ulun bawawancara atawa batakun jua wan sidin, supaya informasi nang tatarang tangguk bisa tarang bujur.
Sidin jadi Katua MUI Provinsi Kalsel dua periode, sejak 2016-2021-2026. Uun dkk jadi anak buah sidin di MUI. Suatu hari, karna kaasyikan atawa kalalawasan bapander di Kantor MUI Kompleks Masjid Raya Sabilal Muhtadin, ulun suah jua tapahurup kupiah lawan sidin. Kada sangaja ulun andak kupiah di atas mija batataian lawan kupiah sidin. Imbah handak bulik ulun langsung manjumput kupiah di atas mija, lalu mamuruk kupiah, kada maminandui lagi nang mana kupiah saurang nang mana kupiah sidin, sualnya kupiahnya sama-sama putih. Sidin kada managur jua. Untung sabalum kaluar ruangan ulun marasa-rasa kupiah pina lunggar wan harum, babida lawan ampun ulun nang sasak lawan kada harum, jadi ulun bulikakan ka mija sidin. Sidin tatawa haja, disaksikan oleh Evi Amiarsa Husaini (alm) yang dahulu mandampingi sidin.
Bakaitan lawan buku edisi nang kadua ini, ulun sampat jua bapander wan Mualim Husin Naparin. Ujar sidin, amun buku ini ditarbitakan pulang, maka edisi ini dirubah judulnya jadi 75 tahun, karna umur sidin sudah bertambah jua. Wan gambar covernya baubah sadikit dibanding buku nang tarbit panambaian. Ulun sudah jua bapander lawan panulisnya, adinda Nur Hidayatullah, baik langsung maupun via media online. Menurut ulun, isi buku ngini sudah bagus banar, padat, baik kisahnya maupun ilustrasi foto-fotonya lengkap. Rupanya Mualim Husin sangat apik, rapi wan pandai manjaga dokumen wan gambar nang bahari sampai wayahini. Amun kita satumat gin rusak wan hancur sudah.
Dalam buku edisi kadua ngintu kada talalu banyak nang ulun edit. Daftar isinya ulun ringkas. Ulun sudah pang bausaha manjanaki tiap-tiap halaman, tiap kata dan kalimat. Tapi karna bukunya kandal banar, kada mustahil ada nang taliung ma-edit. Jadi, mun ada nang kada ta-edit ulun muhun maaf. Maklum umur wan mata pina sasain batuha jua sudah.
Banyak banar palajaran nang parlu kita putiki matan buku biografi Mualim Husin Naparin. Di antaranya, sidin cangkal bangat sakolah wan kuliah. Kuitan sidin jua dalas balangsar dada, ujar pajuang kita bahari, dalas hangit, haram manyarah, waja sampai kaputing. Barakat kagigihan, du’a kuitan, wan dukungan paguruan, akhirnya sidin bahasil jua. Kita basyukur, kabarhasilan sidin gasan umat dan banua jua, kada gasan sidin saurangan.
Jadi, siapa haja warga banua kita, jangan capat putus asa. Jangan jua parajuan amun dihapak atawa dihawai-hawai urang. Kita ni sadikit-sadikit maraju, sakit sadikit manyarah, lalu baampih sakulah, atawa kada manyambung lagi. Alasannya kuitan kada mampu, padahal balum mancuba. Amun dicuba, dijalani bujur-bujur, tantu ada haja jalannya. Apalagi wayahini banyak haja beasiswa.
Akhirnya, Ulun wan kita barataan tantunya salalu badu’a kapada Allah Ta’ala, mudahan Mualim Husin Naparin disihatakan badan wan dipanjangakan umur, sahingga kawa tarus badakwah di tangah umat Islam Indonesia, khususnya di Kalimantan Selatan.
Hari Rabu lalu 6 Mei 2026, mualim Husin Naparin telah wafat dalam usia 79 tahun. Beliau tutup usia di RSI Sultan Agung Banjarbaru. Dishalatkan di beberapa tempat di antaranya di Masjid Jami Banjarmasin dan di Pondok Rakha Amuntai. Dimakamkan di kampung halamannya di Kalahiyang Paringin Balangan. Semoga beliau berlimpah rahmah, dakwahnya tetap lestari dan diteruskan oleh generasi yang lebih muda. Amin.
